O outono chega con forza a Mondoñedo, e con el volve unha das citas máis queridas pola veciñanza: o Magosto Tradicional, que se celebrará o sábado 8 de novembro de 2025 na Praza do Concello. Desde as 18:00h, os máis pequenos tomarán as rúas do centro co seu “Truco ou Trato de Samaín”, enchendo de risas e disfraces a vila. E ás 19:30h, comezará o magosto propiamente dito, cunha proposta que mestura sabor, música e tradición: castañas asadas, viño, chocolate quente e a actuación da artista María Raxeta, que porá ritmo á noite. Este magosto é moito máis ca unha festa: é un reencontro, unha homenaxe á cultura popular, e unha mostra de que seguimos vivos, unidos e orgullosos da nosa terra.
🟣 Despois do Magosto… prepárase o Breasón! Mondoñedo non baixa o ritmo. Logo de compartir castañas, viño e tradición na Praza do Concello, a cidade énchese de enerxía para acoller o Breasón ’25, un festival alternativo, diverso e cheo de propostas culturais que terá lugar o 8 de novembro. A carpa instalada para a ocasión será o epicentro dunha xornada intensa e gratuíta, con concertos, obradoiros, catas, roteiro, habitación de escape, acampada interior e moito máis. Todo pensado para que a xente nova —e a non tan nova— viva Mondoñedo dun xeito diferente, creativo e participativo. O cartel musical é potente: Biznaga, Grande Amore, 9Louro, Malvela, Señora DJ, Femfarria, María Raxeta e Meniñ@s da Mariña poñerán banda sonora a unha noite que promete ser memorable. E como non podía faltar, tamén haberá magosto e foliada, para que a tradición siga presente entre os ritmos contemporáneos. O Breasón é moito máis ca un festival: é unha celebración da cultura libre, da música que une, da creatividade que transforma. Mondoñedo volve estar en festas, e ti tamén formas parte.
San Lucas 2025: emoción, tradición e espectáculo nunha edición para lembrar
Bueno, pois xa non teño moito máis que dicir das San Lucas deste ano 2025… ou si: ESPECTACULAR. En participación, en actuacións, en organización… todo estivo á altura dunha festa que medra e emociona cada vez máis.
Dentro do que puiden, penso que deixei uns bonitos reportaxes —quizais non de todo— pero tamén é importante disfrutar das festas sen estar sempre detrás do foco. Porque as San Lucas tamén son para vivilas, sentilas e compartilas.
🐎 E como non, pechamos coa tradicional doma nocturna celebrada diante da Praza da Catedral, protagonizada por Miron Bococci. Xa leva uns anos vindo, e sinceramente, non me canso de velo. Un espectáculo visual e emocional que pon o punto final perfecto a unhas festas inesquecibles.
Grazas a todos por seguir, compartir e vivir estas San Lucas 2025. Ata o ano que vén… e que sexa aínda mellor! 🎉🐴
Unha feira histórica nas San Lucas 2025: calor, xente e tradición a rebordar en Mondoñedo
Chegamos ao día grande da feira das San Lucas 2025 cun ambiente absolutamente impresionante. A mañá presentouse calorosa e luminosa, e as rúas de Mondoñedo ateigáronse de xente desde primeiras horas, nunha das edicións máis concorridas que se lembran. Aínda que todos os anos a feira reúne moita participación, este 2025 superou todas as expectativas. A sensación compartida entre veciñanza e visitantes é clara: as San Lucas medran ano a ano, consolidándose como unha das festas máis emblemáticas de Galicia. 📸 As imaxes que acompañan esta publicación son cortesía de mondoñedo.net, que capturou á perfección a esencia desta xornada única. 🎥 E se queredes ver máis fotos e vídeos das San Lucas 2025, podedes visitar o seguinte enlace: 👉 Ver máis contido audiovisual das San Lucas 2025 Seguimos celebrando, compartindo e vivindo a festa como se merece. Mondoñedo está máis vivo ca nunca!
Efecto Mariposa fai vibrar a Praza do Seminario nunha noite inesquecible das San Lucas 2025
Na noite do venres, a Praza do Seminario de Mondoñedo converteuse nun auténtico escenario de emoción e música coa actuación de Efecto Mariposa, un dos concertos máis agardados das San Lucas 2025.
Desde os máis novos ata os seguidores de toda unha vida, o público entregouse por completo, cantando e bailando cada tema como se fose o primeiro. A banda demostrou que os bos grupos nunca morren, e que a boa música mantense viva xeración tras xeración.
A conexión entre artistas e público foi total, creando unha atmosfera máxica que quedará gravada na memoria de todos os presentes. Unha noite de enerxía, sentimento e celebración que reafirma o espírito das San Lucas.
A Baixada dos Cabalos nas San Lucas 2025
Un momento máxico diante da Catedral de Mondoñedo
Centos de animais atravesaron as rúas históricas da vila, pasando por diante da nosa impoñente catedral, nunha escena que mestura tradición, beleza e identidade.
A carroza das Sanluqueiras abre camiño ao pregón das San Lucas 2025 con música e emoción
Ás oito e media da noite, a praza do Concello de Mondoñedo encheuse de ambiente festivo coa saída da carroza das Sanluqueiras, acompañada pola comitiva oficial, autoridades locais e o pregoeiro deste ano: Carlos Folgeira, fillo do mítico “Rei das Tartas”.
O desfile avanzou con elegancia cara ao Auditorio Pascual Veiga, onde se celebrou o acto do pregón que marca o inicio oficial das festas das San Lucas 2025. Carlos Folgeira, cunha intervención emotiva e chea de orgullo mindoniense, deu o pistoletazo de saída a uns días de celebración, tradición e encontro.
Para pechar a noite, o Coro Mestre Pacheco deleitou a todos os presentes cunha actuación que encheu o auditorio de música e sentimento, poñendo o broche de ouro a unha xornada inesquecible.
San Lucas 2025 arrinca cun almorzo multitudinario e cheo de sabor e música en Mondoñedo
O primeiro día das festas de San Lucas 2025 comezou por todo o alto en Mondoñedo cun almorzo espectacular dedicado ás persoas maiores, celebrado no pavillón de deportes da vila. A cita reuniu a preto de 400 asistentes, entre maiores e veciños que quixeron sumarse á celebración, nun ambiente de festa e convivencia.
O menú, servido por Chao de Brea, estivo á altura das expectativas: entrantes variados, callos saborosos, codillo no seu punto, sobremesa e chupito para rematar. Todo coidado ao detalle, nunha xornada que foi todo un éxito gastronómico e social.
A festa completouse con sorteos para os participantes e a actuación de dous integrantes da recoñecida orquestra Principal, que puxeron a nota musical a unha tarde amena e divertida para todas as idades.
Así comezan as San Lucas 2025: con sabor, música e moita participación. Que sigan os festexos!
Mondoñedo celebra a apertura dun novo espazo comercial que promete dinamizar a súa actividade económica e social. Isa e Susana, dúas emprendedoras apaixonadas pola cidade, decidiron apostar por un concepto innovador: un “laboratorio comercial” que combina moda, decoración para o fogar e pezas vintage e retro, creando unha experiencia de compra única.
Este establecemento non só ofrece produtos con historia e personalidade, senón que tamén representa un impulso á revitalización do comercio local. As fundadoras buscan inspirar a outros emprendedores para que se sumen á transformación comercial de Mondoñedo, promovendo novas alternativas de negocio que atraian tanto aos veciños como aos visitantes.
A apertura deste espazo marca un novo capítulo no panorama comercial da cidade, demostrando que a creatividade e a paixón son clave para construír iniciativas sostibles e exitosas.
Non perdas detalle da Semana Santa que ano tras ano une os mindonienses! 📸🙏
A fe persiste: emoción na Procesión da Soledad en Mondoñedo
Para rematar a Semana Santa de Mondoñedo, a Procesión da Soledad amosa a gran cantidade de xente devota, ou que polo menos cre e se agarra a algo. Todos, en conxunto, crean momentos moi emotivos nas procesións.
Un dos instantes máis conmovedores aconteceu cando a procesión percorreu o claustro da Catedral, un espazo cheo de historia e espiritualidade. O silencio respectuoso, a luz das velas e o eco dos pasos engadiron unha atmosfera única, intensificando a solemnidade do momento.
Non está todo perdido, hai fe.
A emoción e solemnidade da Banda da Orden Terceira na procesión do Santo Enterro en Mondoñedo
A Banda da Orden Terceira de Mondoñedo protagonizou un dos momentos máis emotivos da procesión do Santo Enterro, celebrada ás seis da tarde no interior da impoñente Catedral mindoniense.
A procesión, que percorreu o templo histórico, foi un dos actos centrais da Semana Santa mindoniense, atraendo a veciños e visitantes que se achegaron a compartir este instante de fe . O son da Banda da Orden Terceira elevou a intensidade emocional da cerimonia, deixando unha pegada imborrable na memoria de todos os presentes.
A fe mantense en Mondoñedo: o Vía Crucis celebrouse no Claustro da Catedral
Despois da cancelación do Santo Encuentro, os fieis de Mondoñedo puideron vivir o Vía Crucis que tivo lugar no Claustro da Catedral. A procesión iniciouse ás doce do mediodía, ofrecendo un espazo de reflexión e recollimento.
Polo visto, as restantes procesións previstas para estes días—o Santo Enterro e a da Soledad—manteranse segundo o programado. No caso de choiva, realizaranse no interior da Catedral, garantindo así a celebración destes actos litúrxicos tan arraigados na Semana Santa mindoniense.
A pesar dos contratempos, a tradición e a fe seguen máis vivas ca nunca.
O Vía-Crucis dos Remedios e San Blas, unha procesión adaptada ao tempo
Sumamos novas imaxes á galería da Semana Santa Mindoniense co Vía-Crucis dos Remedios e San Blas. A procesión, que inicialmente ía celebrarse no exterior, trasladouse á igrexa dos Remedios ante a posibilidade de choiva, aínda que finalmente o tempo mantívose estable. O acto iniciou ás sete da tarde, conservando a devoción propias da celebración.
Domingo de Ramos
Mondoñedo inicia a Semana Santa cunha multitudinaria procesión de DOMINGO DE RAMOS.
Mondoñedo deu comezo á súa tradicional Semana Santa cunha gran afluencia de fieis nas procesións de Domingo de Ramos e do ECCE HOMO. A celebración, que marcou o inicio desta época de reflexión , contou cun tempo favorable que permitiu que os actos transcorresen sen ningún tipo de contratempo.
A primeira das procesións, a do Domingo de Ramos, partiu ás once e media da mañá desde a Iglesia Nova, percorrendo o itinerario habitual e acompañada por unha nutrida participación. Pola tarde, a esperada procesión do ECCE HOMO iniciou o seu percorrido desde Alcántara ás sete en punto, congregando numerosos asistentes que acompañaron a imaxe ao longo do seu traxecto polas rúas históricas da cidade.
Este sábado, a cidade de Mondoñedo vestiuse de festa para celebrar un Antroido 2025 inesquecible. Ás cinco da tarde deu comezo unha tarde repleta de maxia e cor, onde un sen fin de participantes encheron as rúas coa súa creatividade e entusiasmo.
O tempo, aínda que ameazaba con algunha treboada, mostrouse favorable e deixou que o evento se desenvolvese sen imprevistos. Nun ambiente cheo de alegría, os veciños e visitantes gozaron dun dos carnavais máis fermosos da rexión.
Entre música, disfraces espectaculares e moito humor, Mondoñedo demostrou unha vez máis por que o seu Antroido é unha das citas máis esperadas do ano. Foi, sen dúbida, unha festa para recordar.
1. Todos os participantes poderán anotarse no correo entroidomindoniense@gmail.com ou nos teléfonos 982524003 (INSCRICIÓNS) e 982507177 (INFORMACIÓN). O prazo máximo para inscribirse será ata as 23,59 horas do venres 7 de marzo. Á hora de inscribirse facilitaranse os seguintes datos: nome do disfraz, nome completo da persoa disfrazada, número do DNI da persoa representante, teléfono de contacto, enderezo, e no caso de grupos e comparsas, nome da asociación, cif, e/ou nome completo dunha persoa responsable do grupo.
2. Os dorsais deberán ser recollidos entre as 16 e 17 horas do sábado, do edificio municipal do Campo dos Paxariños (antiga oficina de Emprego) e serán adheridos ao disfraz nun lugar visible.
3. Ás 17 horas, os disfraces deberán estar preparados para atender ás indicacións da organización e proceder ao seu posicionamento no desfile, para que discorra coa máxima orde posible e cumprir co horario previsto.
4. O desfile sairá do Campo dos Paxariños, ás 17:30 horas, e percorrerá a avenida San Lucas e as rúas Bispo Sarmiento, Andrés Baamonde e Progreso para finalizar na Praza da Catedral.
5. As comparsas e charangas que gardarán unha entidade temática tanto no seu vestiario como na súa actuación.
6. Considerase categoría infantil aqueles participantes menores de ata 12 anos de idade incluídos. No apartado de grupos infantil, polo menos a metade dos seus compoñentes deberán ser menores de ata 12 anos de idade, podendo ir acompañados de varios maiores disfrazados. As parellas compostas por un membro maior de idade deberán anotarse na categoría de adultos. Os menores da categoría infantil poden ir acompañados en todo momento por unha persoa maior responsable.
7. Os grupos de adultos poderán anotarse en dúas categorías en función do seu tamaño: ata 10 ou máis de 10 membros. Os grupos que concorran acompañados dunha carroza deberán cumprir as seguintes dimensións para poder desfilar polas rúas da cidade: 2,5 metros de ancho, 7 metros de longo e 4 metros de alto.
8. O xurado cualificará tanto nas rúas como na propia praza da Catedral, onde todos os participantes poderán interpretar a actuación que teñen preparada, de ser o caso. No que respecta a grupos e comparsas, o tempo de actuación na praza da Catedral non poderá ser moi superior aos 5 minutos.
9. Á hora de conceder os premios valoraranse aspectos coma a orixinalidade, vestiario, calidade musical, capacidade de representación, respecto co medio ambiente, etc.
10. Na entrega de premios é necesario que cada premiado recolla o premio co seu disfraz ou unha parte do mesmo que o identifique. É imprescindible que os disfraces, grupos ou comparsas estean no lugar de entrega, polo menos unha parte dos seus compoñentes, quedando DESERTO o premio no caso de incumprimento.
11. O importe dos premios será efectuado por ingreso bancario os días posteriores ao desfile. Enténdese íntegro e, polo tanto, suxeito a retencións a conta, derivadas da aplicación do imposto sobre as persoas físicas. Solicítase que os disfraces gañadores aporten un número de conta bancaria para poder efectuar o ingreso correspondente nos días posteriores. No caso dos menores, serán os pais, nais ou titores os que deberán aportar o número de conta.
12. A presentación neste concurso implica a autorización de uso das imaxes que se realicen durante o desfile para unha correcta promoción e difusión en redes sociais e outros medios de comunicación.
13. Recoméndase aos concursantes actuar con respecto e evitando ferir a sensibilidade de persoas, maltrato animal ou desobedecer as indicacións da organización. As decisións da organización son inapelables, tendo potestade para tomar calquera tipo de decisión ou cancelación.
A Baixada dos Cabalos nas San Lucas 2025
